"Bakı Payızı"nda vokal nominasiyasının 1-ci və 2-ci turu keçirildi

"Bakı Payızı” istedadlar müsabiqəsinin 1-ci və 2-ci turu keçirilib.

1980-ci illərdə keçirilən “Bakı Payızı” istedadlar müsabiqəsi Azərbaycan səhnəsinə Faiq Ağayev, Aygün Kazımova, Samir Bağırov, İlqar Xəyal kimi möhtəşəm sənətçilər qazandırıb. 35 il sonra eyni adlı müsabiqəyə qatılaraq bu tarixi səhnədə çıxış edən iştirakçılar böyük məsuliyyət daşıyır.

“Bakı Payızı” 2023 istedadlar müsabiqəsinin sonuncu günündə iştirakçılar xarici mahnılardan ibarət müxtəlif maraqlı kompozisiyalar nümayiş etdiriblər.

Müsabiqənin münsiflər heyətində tanınmış incəsənət xadimləri Almaz Ələsgərova, Samir Bağırov, müsabiqənin rejissoru Sevinc Kərimova, Əməkdar artist Tahir Eynullayev, bəstəkar və ifaçı Murad Arif, sevilən aparıcı Könül Arifqızı, tanınmış sirk ustası Allahverdi İsrafilov yer alırlar.

Layihənin bədii rəhbəri və rejissoru Sevinc Kərimova bildirib ki, nəticələr gözləniləndən də yaxşı olub: “Artıq 5-6 aydır ki, iştirakçılarla işləyirəm. Gözümün önündə yeni kollektivlər yaranıb. Ayrı-ayrı ifaçılar tanıdım. Ən çox ona görə sevinirəm ki, səhnəyə yeni simalar gəldi. Elə məqsədimiz də bu idi”.

Qeyd edək ki, iyunun 28-də Bakı Musiqi Akademiyasının Opera Studiyasında “Bakı Payızı” istedadlar müsabiqəsinin ilk turu keçirilib. Bu mərhələdə 13 musiqi qrupu milli mahnılardan ibarət kompozisiyalarla yarışıblar. İyunun 30-da keçirilən müsabiqənin ikinci turunda isə 45 vokalçı səhnədə xarici mahnılardan ibarət kompozisiyalar səsləndiriblər. Musiqi qrupları ilk turda Azərbaycan, ikinci turda isə xarici dildə mahnılar ifa ediblər. Qaliblərin adları oktyabrın 2-də keçiriləcək “Bakı Payızı” adlı konsertdə elan olunacaq.