"Baku TV" Qarabağda yayıma başlayacaq

Audiovizual Şuranın növbədənkənar iclası keçirilib.

Şuradan verilən xəbərə görə, iclasda Azərbaycanın Qarabağ iqtisadi rayonunun ərazisində keçirdiyi uğurlu və sürətli lokal antiterror tədbirləri, bu tədbirlərdən sonra bölgədə yaranan vəziyyət, həmin bölgədə yaşayan əhalinin informasiya təminatının yaradılması və bölgənin ümumölkə informasiya məkanına reinteqrasiyasının təmin olunması, habelə lisenziyaların alınması üçün "Baku TV" MMC-nin və "Azərbaycan Televiziya və Radio Verilişləri" QSC-nin Audiovizual Şuraya müraciətləri müzakirə olunub.

Qarabağ iqtisadi rayonunun ərazisində yaşayan əhalinin obyektiv və operativ informasiya ilə təminatının yaradılmasının təxirəsalınmazlığını nəzərə alaraq Audiovizual Şura "Baku TV" MMC-yə peyk yayımı həyata keçirən platforma yayımçısı, "Azərbaycan Televiziya və Radio Verilişləri" QSC-yə isə ümumölkə yerüstü radio yayımçısı lisenziyalarının verilməsi haqqında müvafiq qərarlar qəbul edib.