"Evə çıxırıq, yenə cərimə gəlir" | Parklanma yeri yoxdursa, nə etməli? - Baku TV
Yeniliklərdən dərhal xəbərdar olun
Binəqədi rayonu, Dağlıq küçəsi 22 və ona paralel olan Eldar Babayev küçəsinin sakinləri parklanma ilə bağlı ciddi çətinlik yaşayırlar. Sakinlərin bildirdiyinə görə, əvvəllər avtomobillərini yaşadıqları binaların qarşısında maneəsiz saxlaya bilsələr də, son bir aydır qanunsuz parklanma səbəbindən mütəmadi olaraq cərimələnirlər.
Vətəndaşlar onlara hər dəfə 60 manat cərimə və 2 cərimə balı tətbiq edildiyini vurğulayırlar.
“Hər səhər oyanıb telefona baxanda yeni cərimələrin gəldiyini görürük. Yol polisi əməkdaşları demək olar ki, hər gecə gəlib protokol yazırlar. Hətta avtomobili gözdən uzaq yerdə saxlasaq belə, yenə də cərimə tətbiq olunur”, – sakinlərdən biri söyləyib.
Digər bir vətəndaş isə qeyd edib: “Maşını saxlayıb rahat şəkildə evimizə qalxa bilmirik. Son 20 gün ərzində mənə 3 dəfə cərimə gəlib, amma ərazidə qanuni parklanma yeri yoxdur. Avtomobili məcbur qalıb tinlərdə, künc-bucaqda gizlətməyə çalışırıq, lakin yenə də cərimə yazırlar”.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, parklanma yerləri təşkil edilərkən mövcud yol infrastrukturu və piyada təhlükəsizliyi əsas götürülür:
“Sözügedən ərazidə aparılan təhlillər nəticəsində yol şəraitinin əlverişsiz olduğu müəyyən edilib. Bu səbəbdən həmin ünvanda ödənişli parklanma məntəqəsinin təşkili hazırda mümkün deyil. Gələcəkdə yol infrastrukturu təkmilləşdirilərsə, bu məsələyə yenidən baxıla bilər”.
Qeyd edək ki, mövcud qanunvericiliyin tələbinə əsasən, nəqliyyat vasitələrinin səkidə dayandırılması qadağandır. Qayda pozuntusu aşkar edildiyi halda sürücü barəsində İnzibati Xətalar Məcəlləsinin 346.9-cu maddəsinə əsasən, 2 cərimə balı və 60 manat məbləğində cərimə tətbiq olunur.
#Binəqədi teqi istifadə olunub
- Binəqədidə sakinlər kanalizasiya probleminə görə çətin vəziyyətdə - Baku TV CANLI
- “Şəhərin mərkəzində belə şey olar?!” | Çirkab suları sakinləri təngə gətirdi - Baku TV
- 28 May yaşayış massivinin küçələri bərbad vəziyyətdədir
- Binəqədinin keçilməz yolları | 28 May yaşayış massivində küçələr niyə bərbad haldadır? - Baku TV
- “Dəhşətli qoxu gəlir, gediş-gəliş çətinləşir” | Hökməli sakinlərini boğaza yığan mənzərə - Baku TV
