"Facebook"dan Azərbaycana qarşı təxribat

Son günlər sosial şəbəkələrdə, xüsusən də “Facebook”da Azərbaycana qarşı təxribat baş verir.

Belə ki, paylaşımlarda və şərhlərdə Azərbaycan bayrağı qeyd edilən zaman həmin paylaşımlar digər dillərə, ələlxüsus da rus və ingilis dillərinə tərcümə edilərkən dövlət bayrağımız Ermənistan bayrağı ilə əvəzlənir.

Bunun texniki problem, yoxsa təxribat xarakterli olmasına gəlincə, ekspertlər deyir ki, bu cür hallar mütəmadi olaraq baş verir. “Bu, sadəcə texniki xətadır, heç bir təxribatdan söhbət gedə bilməz”, - deyə sosial media üzrə ekspert Elçibəy Məmmədov qeyd edib.

Məsələ ilə bağlı Rəqəmsal İnkişaf və Nəqliyyat Nazirliyindən bildirilib ki, “Facebook” sosial şəbəkəsində paylaşımlarda Azərbaycan bayrağı ilə əlaqədar yaranmış neqativ halın aradan qaldırılması məqsədilə Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti sosial şəbəkənin inzibatçı “Meta Platforms, Inc.” şirkətinə son 1 ayda 2 dəfə müraciət ünvanlayıb. Sonuncu müraciətdə məsələnin ciddiliyi və sosial şəbəkənin Azərbaycan seqmentinin istifadəçilərinin məsələ ilə əlaqədar narahatlığı vurğulanaraq, yaranmış neqativ halın qısa müddətdə aradan qaldırılması xahiş olunub.

Şirkət tərəfindən bildirilib ki, məsələ ilə əlaqədar araşdırma aparılır və qısa zamanda araşdırmanın nəticələri barədə məlumat təqdim ediləcək.