"Təhminə"ni çəkəndə infarkt keçirdi, filminə əngəl oldular, son arzusu siqaret idi | Rasim Ocaqov

Baku TV-də Xalq artisti, kinorejissor Rasim Ocaqova həsr olunan veriliş yayımlanıb.

Verilişdə kinoşünas Aydın Kazımzadə, operator Rəfail Qəmbərov, xalq artisti Hacı İsmayılov və digər tanınmış şəxslər Rasim Ocaqovla bağlı xatirələrini bölüşüblər.

Kinoşünas Aydın Kazımzadə bildirib ki, Rasim bəy operator sənətinə vurğun olsa da, daha sonra rejissor olmaq qərarına gəlir:

“Rasim rejissor olmaq istəyəndə, Adil İsgəndərov ona icazə vermədi. Dedi ki, get diplom gətir. Ona görə də Rasim Ocaqov İncəsənət Universitetini oxuyur. Diplomunu Adil bəyə təqdim edəndən sonra yarımçıq qalan “Qatır Məmməd” filmi ona həvalə edilir və bu film Rasim Ocaqovun kinoda ilk işi olur”.

Operator Rəfail Qəmbərov “Ad günü” filminin quruluşçu operatoru ola bilmədiyi üçün məyus olduğunu deyib:

“Rasim bəy bu filmə məni dəvət edəndə Ağstafada başqa film çəkilişində idim. Ağstafadakı çəkilişlər uzandığı üçün “Ad günü” filmi mənə qismət olmadı”.

Xalq artisti Hacı İsmayılov aktyorluq həyatının necə başladığından danışıb:

“O vaxtlar kinostudiyada filmləri səsləndirirdim. Rasim Ocaqov “Ad günü” filminə məni dəvət etdi. Ağlıma gəlməzdi ki, kimsə məni filmə dəvət edər. Rasim Ocaqov dünyasına daxil olmasaydım, həyatım, yaradıcılığım tamamilə başqa cür ola bilərdi”.