Rusiyada miqrasiya mafiyası ifşa olundu

Təxminən 4 il ərzində Perm şəhərində miqrantlara Rusiyada qalmaq üçün icazə almaqda qanunsuz şəkildə kömək edən cinayətkar qrup fəaliyyət göstərib.

Cinayət iştirakçıları ölkəyə gələn xarici vətəndaşlar üçün rus dili, Rusiya tarixi və qüvvədə olan qanunvericiliyin əsasları üzrə imtahanların keçirilməsinə imkan verən bir sıra müqavilələr bağlayıblar.

İxtisas imtahanlarının nəticələrinə görə, müraciət edən şəxslərə ölkə ərazisində qanuni qalmaq hüququnun verilməsi və ya rədd edilməsi barədə qərar qəbul olunub.

Cinayət sxeminin iştirakçılarından biri potensial müştəriləri tapmaq və onlara əlavə ödəniş qarşılığında sənədləri alma şanslarını artıra biləcəklərini izah etmək vəzifəsini daşıyıb.

Saxtalaşdırılan attestasiya nəticələrinə görə, alınan əlavə haqq bir neçə min rubladək çatıb. Bir neçə Rusiya regionunda fəaliyyət göstərən bu şaxələndirilmiş cinayət şəbəkəsinin mövcud olduğu müddət ərzində təxminən 200 miqrant imtahanların saxtalaşdırılan nəticələri əsasında müvafiq sənədlər əldə edib.

Məhkəmə müştərilərin cəlb edilməsi ilə məşğul olan Azərbaycan vətəndaşının hərəkətlərində Cinayət Məcəlləsinin qanunsuz miqrasiyanın təşkili cinayət tərkibini müəyyən edib. Ona ümumi rejimli müəssisədə 2 il 6 ay müddətinə azadlıqdan məhrumetmə cəzası təyin olunub, əlavə olaraq 200 min rubl məbləğində cərimə kəsilib.