Rusiyalı fotojurnalist ermənilərin vəhşiliyindən danışdı

Rusiyalı fotojurnalist Sergey Kivrin Baku TV-yə Azərbaycan xalqının məharətindən, ermənilərin isə vəhşiliyi və vandallığından danışaraq Qarabağda gördüklərindən söz açıb.

“Müharibə bitdikdən, 7 rayon işğaldan azad edildikdən sonra, Qarabağda bərpa işləri aparılan zaman 5 dəfə o ərazilərə getmişik. Əgər məndən o zaman müsahibə alsaydınız, bir kəlmə belə deyə bilməzdim, çünki gördüklərimizdən nitqimiz tutulmuşdu. Bütün evlər dağılmışdı, özü də hərbi yolla deyil, məqsədyönlü şəkildə. Məzarların dağıdılıb talan edilməsi bizi dəhşətə gətirdi. Bu barədə hətta “Facebook”da paylaşım etdim və erməni dostlarım belə o materialları görəndə dəhşətə gəldilər. Çünki istənilən şüurlu insan müharibəyə və vəhşiliyə qarşıdır. 

Mən “Dirçəliş. Başlanğıc” kitabının həmmüəllifiyəm, əsas müəllif isə Azərbaycan xalqıdır. Dağın içindən rekord bir vaxta tunel çəkmək bir kitab yazmaqdan daha çətindir”, – deyə fotojurnalist bildirib.

Qeyd edək ki, Sergey Kivrinin lentə aldığı fotomateriallar “İRS” silsiləsi çərçivəsində sayca 21-ci olan “Dirçəliş. Başlanğıc” kitabında dərc olunub.