Rusiyanın “bəraət”ləri dünyada gülüş hədəfi oldu | “Guya biri etiraf edib ki...”

Rusiya hüquq-mühafizə orqanlarının Yekaterinburqda azərbaycanlılara qarşı törətdiyi vəhşiliklər haqqında dünya mediasında reportaj və məqalələr paylaşılıb.

“Saxlanılanlar ölənə qədər döyülüb” başlıqlı materiallarda OMON-un iç üzü ifşa olunub.

“Əl Cəzirə”də bölüşülən yazıda qeyd olunub ki, 2001-ci ildə çayın kənarında bıçaqla öldürülən kişi guya son nəfəsində polisə cinayəti törədənlərin kimliyini açıqlayıb.

Məqalədə Rusiya tərəfinin irəli sürdüyü versiyalar gülüş hədəfinə çevrilib. Çünki saxlanılan azərbaycanlılar 24 il ərzində gizlənməyiblər. Hətta məşhur restoranlardan birinin sahibi olublar.

Yazıda Azərbaycanın bu zorakılığı qınadığı qeyd edilib. Dünya mediasında baş verənlərə görə Azərbaycanın etirazına da yer verilib. Belə ki, “Euronews”da yayılan yazıda Rusiyanın Bakıda ləğv edilən mədəni tədbirlərindən bəhs olunub.

“Saxlanılan şəxslərdən ikisinin ölümü Bakı ilə Moskva arasında anlaşılmazlıqlara səbəb olub” başlıqlı məqalə isə “Dawn”da paylaşılıb.

Rusiya hüquq-mühafizə orqanlarının Yekaterinburq vəhşiliyi haqqında yazılar BBC, “Associated Press”, “Bloomberg”, “Arab News” və digər tanınmış saytlarda bölüşülüb.