Sabiq deputat hakim qarşısında | Nazim Bəydəmirli niyə etiraz etdi?
Hədə-qorxu ilə tələb etməkdə təqsirləndirilən sabiq deputat Nazim Bəydəmirlinin cinayət işi üzrə ilk məhkəmə baxış iclası keçirilib.
Bakı Ağır Cinayətlər Məhkəməsinin hakimi Fərid Namazovun sədrliyi ilə baş tutan iclas zamanı təqsirləndirilən şəxsin vəkili Aqil Layıc müvəkkili barədə irəli sürülən ittihamın əssasız olduğunu bildirərək onun barəsində həbs qətimkan tədbirinin dəyişdirilməsi ilə bağlı vəsatət qaldırıb.
Qısa müşavirədən sonra məhkəmə heyəti vəkilin vəsatətini təmin etməyərək sabiq deputat barədə seçilmiş həbs qətimkan tədbirinin qüvvədə saxlanılması barədə qərar qəbul edib.
Prokuror təqsirləndirilən şəxsə ittihamı elan etdikdən sonra ifadə üçün söz Nazim Bəydəmirliyə verilib. O, hazırlıq iclasındakı ifadəsini təkrarlayaraq siyasi məhbus olmadığını və siyasi fəaliyyətinə görə yox, ictimai fəaliyyəti ilə bağlı həbs olunduğunu bildirib.
Qeyd edək ki, eks-deputat 2023-cü ilin iyulunda həbs olunub. İttihama görə, Ədalət Nağıyev adlı şəxs polisə müraciət edərək Nazim Bəydəmirlinin onu rüsvayedici görüntülərlə hədələyərək 50 min manat pul tələb etdiyini deyib. O bildirib ki, 2023-cü il iyunun 24-də Nazim Bəydəmirliyə 10 min manat versə də, sonuncu qalan məbləği vermədiyinə görə şikayətçini ailəsi ilə şantaj edərək əlində olan rüsvayedici görüntülərini yayacağını deyib. O həmçinin 1996-cı ildə Rusiyada törətdiyi əmələ görə təqsirli bilinir.
Nazim Bəydəmirliyə qarşı Cinayət Məcəlləsinin 182.2.4-cü – xeyli miqdarda əmlak əldə etmək məqsədilə hədə-qorxu ilə tələb etmə maddəsi ilə ittiham irəli sürülüb.