Sabiq deputat Nazim Bəydəmirlinin növbəti məhkəməsi keçirildi
Hədə-qorxu ilə tələb etmədə təqsirləndirilən sabiq deputat Nazim Bəydəmirlinin cinayət işi üzrə növbəti məhkəmə iclası keçirilib.
Bakı Ağır Cinayətlər Məhkəməsinin hakimi Fərid Namazovun sədrliyi ilə baş tutan prosesdə zərərçəkmişlərin ifadələri dinlənilib.
Zərərçəkən Ədalət Bağırov ifadəsi zamanı bildirib ki, o, Nazim Bəydəmirlini hazırda həbsdə olan keçmiş hakim Lətif Nəbiyev vasitəsilə tanıyıb. Əmlak alqı-satqısından N.Bəydəmirlinin ona verməli olduğu 120 min dollara görə münasibətləri pozulub.
Zərərçəkən bildirib ki, Nazim Bəydəmirli ödəməli olduğu məbləği millət vəkili seçildikdən sonra verəcəyinə boyun olsa da, buna əməl etməyib. Ədalət Bağırov pulunu istədikdə isə onu intim videoları ilə şantaj edəcəyini deyib və əlavə 50 min manat tələb edib.
Təqsirləndirilən sabiq deputatın vəkili Aqil Layıcın zərərçəkənə “sizin intim videolarınız var idi bəyəm?” sualına cavab olaraq Ədalət Bağırov vurğulayıb ki, Nazim Bəydəmirli ona iki kişinin intim görüntülərini göstərib və “elə edərəm ki, o kişilərdən birinin başı sənin başın olar” deyib. Buna görə də o, məcburən Nazim Bəydəmirlinin tələb etdiyi 50 min manatdan 10 min manatını verib. Bundan sonra isə zərərçəkən polisə şikayət edib.
Digər zərərçəkən Mürsəl İbrahimov Nazim Bəydəmirli ilə 1995-ci ildə Rusiyada tanış olduğunu deyib. Bununla da onların biznes ortaqlığı başlayıb. Bu ortaqlıqdan da müxtəlif vaxtlarda müəyyən maliyyə mübahisələri yaranıb.
Zərərçəkən bildirib ki, sabiq deputatın yaxın qohumu Rusiyada yaşadıqları ərazidə polis rəisi vəzifəsində çalışdığından şikayət edə bilməyib. O, Azərbaycana geri döndükdən sonra isə bu barədə polisə məlumat verib.
Nazim Bəydəmirli öz növbəsində zərərçəkənlərin ittihamlarını rədd edərək ona qarşı səslənən bütün ittihamların iftira olduğunu vurğulayıb.