Sabiq deputatın məhkəməsi keçirildi | O nədə ittiham olunur?

Sabiq deputat Nazim Bəydəmirlinin cinayət işi üzrə məhkəmə istintaqı başa çatıb.

Bakı Ağır Cinayətlər Məhkəməsinin hakimi Fərid Namazovun sədrliyi ilə keçirilən son prosesdə vəkil müdafiə çıxışı etdikdən sonra təqsirləndirilən sabiq deputata sön söz çıxışına imkan yaradılıb. Nazim Bəydəmirli ona elan olunmuş ittihama görə özünü təqsirli bilməyərək məhkəmədən onun barəsində bəraət hökmünün çıxarılmasını xahiş edib. Məhkəmə qısa müşavirədən sonra Nazim Bəydəmirlinin 8 il azadlıqdan məhrum edilməsi ilə bağlı hökmü elan edib.

Xatırladaq ki, ötən prosesdə dövlət ittihamçısı Nazim Bəydəmirlinin 9 il azadlıqdan məhrum edilməsini məhkəməyə təklif etmişdi.

Qeyd edək ki, eks-deputat 2023-cü ilin iyulunda həbs olunub. İttihama görə, Ədalət Bağırov adlı şəxs polisə müraciət edərək Nazim Bəydəmirlinin onu rüsvayedici görüntülərlə hədələyərək 50 min manat pul tələb etdiyini deyib. O bildirib ki, 2023-cü il iyunun 24-də Nazim Bəydəmirliyə 10 min manat versə də, sonuncu qalan məbləği vermədiyinə görə şikayətçini ailəsi ilə şantaj edərək əlində olan rüsvayedici görüntüləri yayacağını deyib. Nazim Bəydəmirliyə qarşı Cinayət Məcəlləsinin 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədilə törədildikdə) maddəsi ilə ittiham irəli sürülüb.