Sanki hər gün 1 kərpici... | Tarixi abidə niyə taleyin ümidinə buraxılıb?

Şabran rayonunun Kilvar kəndində yerləşən Alban kilsəsi məhv olmaq üzrədir.

IV-VI əsrlərə aid olduğu ehtimal olunan tarixi abidə hazırda yararsız vəziyyətdədir.

Tarixçi Rüfət Mürsəlovun sözlərinə görə, milli irsimizin davamçısı olan bu abidə ölkəmizin qədim tarixini özündə əks etdirir.

“Kilsənin tavanı tamamilə uçub. Divarları mamır bağlayıb, kərpicləri düşüb”, ‒ deyə tarixçi əlavə edib.

Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, Şabran Regional İdarəsinin əməkdaşları tərəfindən ərazidə mühafizə tədbirləri həyata keçirilib və tarixi tikilinin qorunması istiqamətində işlər görülür.

Qurumdan həmçinin qeyd edilib ki, abidənin bərpa və konservasiyası üçün layihənin növbəti illərdə dövlət əsaslı vəsait qoyuluşu hesabına icrası planlaşdırılır və bu məqsədlə sözügedən obyektin müvafiq siyahıya daxil edilməsi nəzərdə tutulur.