Sənədsiz evlərlə bağlı vacib açıqlama

Ölkədəki saysız-hesabsız sənədsiz evlərlə bağlı yeni portal yaradılır.

Bununla da vətəndaşların sənədsiz evlərinə Dövlət Reyestrindən çıxarışların alınması prosesi asanlaşacaq.

Bu barədə Daşınmaz Əmlakın Dövlət Kadastrı və Reyestri publik hüquqi şəxsin idarə heyətinin sədr müavini Elşad Məmmədov məlumat verib.

O bildirib ki, Prezident İlham Əliyevin fərmanına əsasən, daşınmaz əmlakın qeydiyyatı və kadastrı üzrə bütün əməliyyatlar elektronlaşdırılacaq:

“Burada önəmli yeniliklərdən biri xüsusilə çoxmənzilli yaşayış binalarında mənzil əldə edilməsi ilə bağlıdır. Bəzi vətəndaşların şikayətləri ilə qarşılaşırıq – bir mənzilin bir neçə nəfərə satılması, ümumi sahəsinin düzgün hesablanmaması, vətəndaşların maliyyə borcunu tam ödəməsinə baxmayaraq, arayışı əldə etməkdə çətinlik çəkməsi.

Yaradılacaq modulda çoxmənzilli yaşayış binasının tikilməsinə icazə alındığı andan həmin binanın xüsusi imitasiyası portalda yaradılacaq. Hər bir mənzil ancaq portal vasitəsilə elektron qaydada alqı-satqı oluna biləcək. Bir şəxsə satıldıqdan sonra həmin mənzil bloklanacaq, başqalarına satılmasına yol verilməyəcək”.

Dövlət rəsmisi onu da bildirib ki, 7 mindən artıq sahibkarın qeyri-yaşayış obyektlərinin sənədləşdirilmə işlərinə başlanılıb. Növbəti mərhələdə isə ölkədə mövcud olan, xüsusilə Sovet İttifaqı dövründə özbaşına inşa edilmiş, sənədləşdirilməsi mümkün olmayan evlərin qeydiyyata cəlb olunması istiqamətində normativ hüquqi sənədlər hazırlanır.

Onu da qeyd edək ki, yaradılacaq portalda elektron arxiv modulu olacaq. Bu vasitə ilə vətəndaşlar fin kodlarını yazaraq indiyə qədər verilmiş sənədlərin elektron surətini əldə edə biləcəklər.