Tbilisidə Aşıq Kamandarın 90 illik yubileyi

Gürcüstanda XX əsr Azərbaycan aşıq sənətinin görkəmli nümayəndələrindən biri, Borçalı aşıq məktəbinin yetirməsi olan ustad aşıq Kamandar Əfəndiyevin anadan olmasının 90 illik yubileyinə həsr olunan tədbir keçirilib.

Azərbaycan Respublikası Diasporla İş üzrə Dövlət Komitəsinin, Azərbaycanın Gürcüstandakı səfirliyinin və Azərbaycan Diasporunun İnkişafına Dəstək Fondunun birgə təşkilatçılığı ilə keçirilən tədbirdə Aşıq Kamandarın həyat və yaradıcılıq yolundan söhbət açılıb.

Belə ki, 1932-ci ildə Borçalıda – indiki Marneuli rayonunun Kəpənəkçi kəndində dünyaya gələn Aşıq Kamandar fitri istedadı sayəsində qısa müddətdə özünəməxsus, bənzərsiz ifa tərzi ilə Azərbaycanda və bütün türk dünyasında sevilən sənətkara çevrilib. Tədbir zamanı böyük ustadın keçdiyi ömür yolundan bəhs edən videoçarx nümayiş etdirilib.

Azərbaycanın Gürcüstandakı fövqəladə və səlahiyyətli səfiri Faiq Quliev çıxış edərək onun yaradıcılığında vətənə, xalqa, millətə sevginin əsas süjet xəttini təşkil etdiyini vurğulayıb. Türkiyə səfirliyinin məsul əməkdaşı Onur Sevim, Gürcüstan parlamentinin sabiq deputatı Ruslan Hacıyev, TİKA-nın Gürcüstan nümayəndəliyinin rəhbəri Tuba Özütok və başqaları da çıxış edərək aşıq Kamandar yaradıcılığından söz açıb, fikirlərini bölüşüblər.

Həmçinin bəzi iştirakçılar yeni təsis edilən “Aşıq Kamandar” medalı ilə təltif ediliblər. Tədbir Borçalı aşıq məktəbinin yetirmələrinin, eləcə də gənc aşıqların ifaları ilə başa çatıb.