Təyyarədən sağ çıxan sərnişin stüardessa Hökumə Əliyevanın cəsarətindən danışdı

Təyyarə qəzasından sağ çıxan Yekaterinburq sakini Subxonkul Rəhimov azərbaycanlı stüardessanın cəsarətindən danışıb.

Hökumə Əliyevanın xidməti vəzifəsini mükəmməl şəkildə yerinə yetirməsi onu heyrətləndirib.

“Stüardessa qadın olmasına baxmayaraq, belə bir dəhşətli vəziyyətdə çox möhkəm dayanmışdı. Vəzifəsini layiqincə yerinə yetirdi. Onun verdiyi komandaya qulaq asıb oturacağa bərk söykəndim. O öz işini qüsursuz yerinə yetirirdi. Hökumə “sakitləşin” deyəndə yadımdadır ki, sərnişinlərdən biri ona etiraz etdi. Stüardessa əsasən Azərbaycan dilində danışaraq insanları sakitləşdirirdi”, – deyə Subxonkul Rəhimov söyləyib.

Qeyd edək ki, dekabrın 25-də “Azərbaycan Hava Yolları” aviaşirkətinin Bakı-Qroznı reysini yerinə yetirən təyyarəsi Aktau şəhərinin yaxınlığında qəzaya uğrayıb. Təyyarənin göyərtəsində 67 nəfər olub. Onlardan 38-i həlak olub. Ölən sərnişinlərin arasında Subxonkul Rəhimovun cəsarətindən danışdığı AZAL-ın stüardessası Hökumə Əliyeva da var.