“Ürəyim ağrıyır, həyəcan keçirirəm, ay Allah!” | Kürdəmirdə sakinlər imdad dilədi - Baku TV

Kürdəmir rayonunun Sığırlı kənd sakinləri Baku TV-nin qaynar xəttinə müraciət edərək bildiriblər ki, təxminən altı ildir həm içməli, həm də suvarma suyunun çatışmazlığından əziyyət çəkirlər.

Onların sözlərinə görə, suyu pulla almaq məcburiyyətində qalırlar. İstifadə etdikləri kanal suyunun yararsız olduğunu deyən sakinlər aidiyyəti qurumlardan problemin həll olunmasını istəyirlər.

“70-ci illərdə bu kənd su sarıdan əziyyət çəkməyib. Amma bu gün, XXI əsrdə böyük bir problem var. Hazırda insanların istifadə etdiyi su Girdiman çayından gəlir. Bu su nəinki insanların, hətta heyvanların da içməsi üçün yararlı deyil. Amma faktiki olaraq kənd əhalisinin yarısı həmin sudan istifadə edir, çənlərə doldurub duruldur. Bu ilin əvvəlində Dövlət Su Ehtiyatları Agentliyinə müraciət etmişik. Kənddən 200-dən çox imza toplayaraq rəsmi şəkildə təqdim etmişik. Amma bu günə qədər heç bir nəticə yoxdur”, – sakinlərdən biri bildirib.

“Bu çəni 50-60 manata doldururam. Nə vaxta qədər çəndəki sudan istifadə edəcəyəm? Qoca arvadam, ayda 200-300 manat xərcim çıxır. Çəndə su qurtaranda ürəyim ağrıyır, həyəcan keçirirəm. Deyirəm, ay Allah, pulum yoxdur, kimə deyəcəyəm? Qapıma gələn deyir ki, sən səhrada yaşayırsan?”, – başqa bir sakin deyib.