Vağzalda parklanmanın dayandırılma səbəbi | ADY tarixi açıqlandı

“Azərbaycan Dəmir Yolları” QSC (ADY) Bakı Dəmiryol Vağzalının parklanma xidməti ilə bağlı yayılan məlumatlara aydınlıq gətirib.

Bildirilib ki, “28 May” metro stansiyası ətrafında Bakı Dəmiryol Vağzalının yaxınlığında havalandırma şaxtasının tikintisinə başlanılır.

“Bakı Dəmiryol Vağzalının parklanma xidməti avqustun 18-dən etibarən müvəqqəti dayandırılacaq. Buna səbəb ərazidə “Bakı Metropoliteni” QSC tərəfindən 200 metrə yaxın tunelin inşasına hazırlıq işləri çərçivəsində havalandırma şaxtasının tikintisidir. Təhlükəsizliyin təmin edilməsi məqsədilə ərazi hazırlanacaq.

Sərnişinlər vağzal ərazisinə parklanma sahəsindəki şlaqbaumun yuxarı hissəsindən və digər girişlər vasitəsilə daxil ola biləcəklər. Tikinti işləri Bakı Dəmiryol Vağzalının fəaliyyətinə və ADY-nin qatarlarının qrafik üzrə hərəkətinə maneə yaratmayacaq”, ‒ deyə qurumdan bildirilib.

Həmçinin o da qeyd olunub ki, parklanma xidmətinin dayandırılması metro şaxtasının tikintisi işləri yekunlaşana qədər davam edəcək.