Vardanyanın məhkəməsində nələr yaşandı?

Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi keçirilib.

Dövlət ittihamçısı Vüsal Abdullayevin suallarını cavablandıran zərərçəkmiş Cəmil Əliyev bildirib ki, Ağdərə rayonunun Çərəkdar kəndində olarkən Ermənistan Ordusunun qalıqları və qanunsuz erməni silahlı dəstələri tərəfindən atılmış tankəleyhinə idarəolunan raket mərmisinin partlaması nəticəsində özü, eləcə də Bəhram Allahyarov və Murad Verdiyev müxtəlif xəsarətlər alıblar. Həmin vaxt yanlarında olan Şikar Hüseynov isə həlak olub.

Digər zərərçəkmiş Yusif Yusifovun sözlərinə görə, Ağdam rayonu ərazisində düşmənin açdığı snayper atəşləri nəticəsində İxtiyar Bayramov həlak olub, özü isə xəsarət alıb.

Şahmar Cəlilov isə qeyd edib ki, içərisində olduqları avtomobil Ağdərə rayonu istiqamətində raketlə vurulub. Bu zamanı özü xəsarət alıb, bir nəfər isə həlak olub.

Dövlət ittihamçısı Təranə Məmmədovanın suallarını cavablandıran zərərçəkmiş Etibar Əliyev vurğulayıb ki, Kəlbəcər rayonunun Susuzluq kəndi ərazisində jurnalistlərlə birgə hərəkət edərkən idarə etdiyi avtomobilin düşmən tərəfindən basdırılmış minaya düşməsi nəticəsində partlayış baş verib və AZƏRTAC-ın müxbiri Məhərrəm İbrahimov, AzTv-nin operatoru Sirac Abışov və kəndin inzibati ərazi dairəsi üzrə nümayəndəsinin müavini Arif Əliyev həlak olub, özü və daha üç nəfər isə müxtəlif dərəcəli bədən xəsarətləri alıb.

Zərərçəkmiş Allahverdi Məmmədli, İntiqam Rüstəmli və Nahid Əsədov Xocavənd, Elşən Rüstəmov Cəbrayıl, Ümüd Şükürov Kəlbəcər, Eynulla Nəsirli Xocalı rayonu istiqamətində düşmənin törətdiyi təxribat nəticəsində müxtəlif dərəcəli xəsarətlər alıblar.

Ardınca məhkəmə prosesi sənədlərin və cinayət işi materiallarında olan digər sübutların tədqiqi ilə davam etdirilib.