Xəstə uşağım var, təcili yardım buraya necə gəlsin? - MTK ilə sakinlər arasında qarşıdurma

Yasamal rayonu, Abdulla Şaiq küçəsi, dalan 1-in sakinləri Baku TV-nin qaynar xəttinə Mənzil-Tikinti Kooperativi ilə bağlı şikayət ünvanlayıblar.

Vətəndaşlar bildirirlər ki, MTK onlarla razılığa gəlmədən mənzillərini sökərək yerində tikinti işləri aparır.

Mənzillərinin sökülməsinə razı olmayan sakinlərin sözlərinə görə, ərazidə aparılan işlər onların evlərinin də zərər görməsinə səbəb olur.

“Birinci dərəcəli əlil uşağım var, həkim lazım olanda, təcili yardım buraya necə gəlsin? Gecə saat 3-də ev silkələnir”, – şikayətçi söyləyib.

Digər bir şikayətçi isə bildirib ki, mənzilinin əvəzinə təklif edilən məbləğlə yeni ev almaq mümkün deyil: “37 ildir ki, burada yaşayıram. Elə məbləğlər təklif edirlər ki, o pula ev ala bilmirəm”.

Məsələ ilə bağlı tikinti şirkətindən bildirilib ki, sakinlərlə razılığa gəlinərək müqavilələr imzalanıb: “Mənzil sahiblərinə hər kvadrata görə 2000-2500 manat arası kompensasiya vermişik. Sakinlərin bir qismi mənzillərinin qarşılığında təklif olunan məbləğlə razılaşmırlar. Pilot layihə olmadığı üçün sakinlərə həmin ərazidən ev verə bilmərik”.