Xəzərin suyunun geri çəkilməsinə səbəb nədir?

Son illər Xəzər dənizinin suyunun geri çəkilməsi cənub rayonlarında da müşahidə olunur. Bu daha çox dənizin Astara rayonu sahillərində özünü göstərir.

Rayon sakinləri dəniz suyunun təqribən 20-25 metr geri çəkildiyini deyirlər.

Astara Dənizkənarı Bulvar tikilməzdən əvvəl xüsusi qurğular və daşlar quraşdırılıb ki, dəniz suları bulvar ərazisinə daxil olmasın. İndi isə buna ehtiyac qalmayıb.

Mütəxəssislər deyirlər ki, Xəzər dənizində suyun geri çəkilməsinin bir sıra səbəbləri var. Ən böyük səbəblərdən biri qlobal istiləşmə və dənizə axan çayların əkin sahələrində geniş istifadə olunmasıdır.

Qeyd edək ki, mövcud vəziyyət Xəzərin dib relyefinin seysmikliyi ilə də sıx bağlıdır. Müxtəlif illərdə müşahidə olunan kəskin azalmalar sonradan dənizdə suyun səviyyəsinin artması ilə əvəzlənib. Bu gün də Xəzərin dibində baş verənlərin müvəqqəti xarakter daşıdığı deyilir.