XİN Xocalı faciəsi ilə bağlı bəyanat yaydı

Xarici İşlər Nazirliyi Xocalı soyqırımının 31-ci ildönümü ilə bağlı bəyanat yayıb.

Bəyanatda bildirilib ki, 7 mindən çox əhalinin yaşadığı Xocalı şəhərinin sakinlərinin soyqırımına məruz qalması Ermənistanın dinc əhaliyə qarşı törətdiyi ən ağır cinayətlərdən və Azərbaycan tarixinin ən faciəli səhifələrindən biridir.

Xocalı şəhəri 1992-ci il fevralın 25-dən 26-na keçən gecə Ermənistan silahlı qüvvələri, keçmiş SSRİ-nin əksəriyyətini ermənilər təşkil edən 366-cı motoatıcı alayının köməyi ilə işğal edildi. İşğal nəticəsində 613 nəfər, o cümlədən 63 uşaq, 106 qadın və 70 qoca vəhşicəsinə öldürüldü. 1275 insan əsir və girov götürülərək işgəncələrə məruz qaldı. Əsir götürülənlərdən 150 nəfərin taleyi bu günədək məlum deyil.

Xocalı soyqırımı və Ermənistanın Azərbaycana təcavüzü zamanı törətdiyi digər cinayətlər insan hüquqları və beynəlxalq humanitar hüququn ciddi şəkildə pozulmasıdır. Hazırda 18 dövlətin milli qanunvericilik orqanı, həmçinin ABŞ-nin 24 ştatı, eyni zamanda İslam Əməkdaşlıq Təşkilatı və Türk Dövlətləri Təşkilatı Xocalıda dinc əhalinin qətliamını pisləyən və bunu soyqırımı və insanlıq əleyhinə cinayət aktı kimi dəyərləndirən çoxsaylı qətnamə və qərarlar qəbul ediblər. Lakin bu günədək Xocalıda törədilən cinayətlərə görə məsuliyyət daşıyanların heç biri Ermənistan tərəfindən cinayət məsuliyyətinə cəlb edilməyib. Öz təqsirini etiraf edən Ermənistanın o dövrdəki müdafiə naziri və sabiq prezidenti Serj Sarkisyan Britaniya jurnalisti Tomas de Vaala müsahibəsində deyib: “Xocalıdan qabaq azərbaycanlılar düşünürdülər ki, ermənilər mülki əhaliyə əl qaldıra bilməyən xalqdır. Biz bu stereotipi sındırdıq”.

Azərbaycan inanır ki, milli səviyyədə, eləcə də mövcud beynəlxalq hüquq çərçivəsində görülən davamlı tədbirlər cəzasızlığa son qoyulmasına və Ermənistanın Azərbaycana qarşı təcavüzü zamanı törədilən ağır cinayətlərə görə məsuliyyət daşıyan şəxslərin ədalət məhkəməsi qarşısına çıxarılmasına xidmət edəcək. Xocalı soyqırımına hüquqi qiymət verilməli və bu dəhşətli faciəni törədənlər öz layiqli cəzalarını almalıdırlar.