Xocalının Seyidbəyli və Daşbulaq kəndlərində quruculuq işləri aparılır

Xocalı rayonunun Seyidbəyli kəndində 140 ev mövcuddur, artıq 10-u bərpa olunub. Bu ilin sonunadək 44, 2026-cı ildə isə daha 64 ev istismara hazır olacaq. İndiyədək kəndə 9 ailə (31 nəfər) köçüb.

Bu barədə Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin İctimaiyyətlə əlaqələr şöbəsinin müdiri Afət Telmanqızı məlumat verib.

Bildirilib ki, kəndə 2 transformator quraşdırılaraq sayğaclaşdırma işlərinə start verilib. Magistral qaz xətləri çəkilib, mövcud qaz xətti, həmçinin su anbarı, subartezian quyusu bərpa edilib, içməli su şəbəkəsi yenidən qurulub, kənddaxili yollar asfaltlanıb.

Rayonun Daşbulaq kəndində həyata keçirilən quruculuq işləri barədə də məlumat verən A.Telmanqızının sözlərinə görə, kənddə uzunluğu 20 kilometr olan mövcud elektrik, həmçinin qaz xətləri, su anbarı və subartezian quyusu bərpa olunub, transformator quraşdırılıb, sayğaclaşdırma işlərinə başlanılıb, içməli su şəbəkəsi yenidən qurulub, rabitə xətlərinin layihəsi təsdiqlənib və artıq tikinti işlərinə hazırlıq gedir. Həmçinin kənddaxili yollara asfalt vurulub.

Qeyd edilib ki, indiyədək kəndə 14 ailə (72 nəfər) köçüb. Hər iki kəndə köç prosesi mərhələli şəkildə davam edəcək.