Yaşlı insanları internetdən istifadəyə həvəsləndirəcək xəbər

Araşdırmaya görə, orta yaşda internetdən istifadə edənlər daha yaşlı dövrdə demensiya inkişaf riskini yarıdan çox azalda bilər.

Alimlər hesab edirlər ki, internetdə rast gəlinən nəhəng informasiyanın emalı insanların beyninə, sosial şəbəkələrdən istifadə isə tənhalıqla mübarizəyə kömək edə bilər.

Çinin Hançjou şəhərindəki Çjetszyan Universitetinin Tibb məktəbinin tədqiqatçıları 2011-ci ildə demensiyadan əziyyət çəkməyən 45 və daha yuxarı yaşlı 12 mindən çox insanı müşahidə ediblər.

“Journal of Medical Internet Research”da dərc olunan araşdırmanın nəticələri göstərib ki, növbəti onillikdə qeyri-istifadəçilərdəki 5,3 faizlə müqayisədə demensiya müntəzəm internet istifadəçilərinin yalnız 2,2 faizində inkişaf edib. Üstəlik, smartfonlarda profilaktik təsir notbuklara nisbətən bir qədər daha güclü olub.

Əldə edilən məlumatlar Avstraliyanın araşdırmasının nəticələrini təsdiqləyir, ona əsasən internetdən istifadə edən 70 yaşdan yuxarı kişilərdə Alzheimer xəstəliyinə tutulma riski təxminən 50 faiz azdır.