Yayın əvəzolunmaz qidaları həyatımız üçün təhlükə yaradır? | Həkimdən xəbərdarlıq - Baku TV

Son günlər qida zəhərlənməsi şikayəti ilə xəstəxanalara müraciət edənlərin sayında artım müşahidə olunur. Vətəndaşların bəziləri mövsümi meyvələrdən, digərləri isə restoranlarda təqdim edilən yeməklərdən sonra səhhətlərində problem yarandığını bildirirlər.

Baku TV-nin paytaxt sakinləri arasında keçirdiyi sorğu zamanı zəhərlənmə yaşayan vətəndaşlardan biri xəstəxanada ona sistem köçürüldüyünü və müvafiq analizlərin götürüldüyünü deyib:

“Restoranda yemək yemişdim. Xəstəxanada sistem qoşdular, analiz götürdülər və zəhərləndiyimi bildirdilər. Təcili yardım şöbəsində eyni şikayətlə müraciət edən daha dörd-beş nəfər var idi”.

Kliniki Tibbi Mərkəzin həkim-toksikoloqu Aynur Məmmədovanın sözlərinə görə, qida zəhərlənməsi halları azyaşlılar üçün daha təhlükəlidir. Xüsusilə isti hava şəraitində açıq havada saxlanılan ət, mayonezli məhsullar və tərəvəzlər sanitar-gigiyenik qaydalara əməl olunmadıqda zəhərlənməyə səbəb ola bilər.

Həkim yay aylarında dönər, konservləşdirilmiş və hisə verilmiş məhsullar, kolbasa və sosiska kimi qidaların qəbuluna diqqətlə yanaşmağı tövsiyə edib. Torpaqla təmasda olan çiyələk, qarpız və yemiş kimi meyvələrin isə istifadə edilməzdən əvvəl dəfələrlə yuyulmasının vacib olduğu bildirilib.

Mütəxəssislər bildirirlər ki, qida qəbulundan bir-üç saat sonra ürəkbulanma, təkrarlanan qusma, qarında sancı, yüksək hərarət, ishal, halsızlıq və başgicəllənmə yaranarsa, bunlar qida zəhərlənməsinin ilkin əlamətləri ola bilər.

Zəhərlənmə əlamətləri göbələk, konservləşdirilmiş məhsullar və ya mənşəyi məlum olmayan qidaların qəbulundan sonra başlayarsa, dərhal həkimə müraciət etmək lazımdır.