“Zibilliyə döndərmişdilər” | Hövsanda xeyir-şər evi qalmaqalı sakinləri özündən çıxardı - Baku TV

Suraxanı rayonunun Hövsan qəsəbəsində, 1 saylı Zeytun sovxozunda yerləşən ərazidə sakinlərin öz vəsaitləri hesabına inşa etdiyi tikili Dövlət Əmlak Xidməti tərəfindən sökülüb.

Baku TV-nin qaynar xəttinə müraciət edən sakinlərin sözlərinə görə, ərazi 2011-ci ildə zibillik olub. Onların müraciətindən sonra ərazi icra hakimiyyəti tərəfindən təmizlənib və burada xeyir-şər evinin tikiləcəyi bildirilib.

Sakinlərin iddiasına görə, illər keçməsinə baxmayaraq, ərazidə tikinti ilə bağlı heç bir iş görülməyib. Buna görə də onlar icra hakimiyyətindən razılıq aldıqdan sonra öz vəsaitləri hesabına tikintiyə başlayıblar. Lakin işlərə başlanıldıqdan sonra Dövlət Əmlak Xidmətinin əməkdaşları əraziyə gələrək tikilini söküblər.

Sakinlər bildirirlər ki, tikintinin qanunsuz olduğu onlara əvvəlcədən bildirilməyib. Onların sözlərinə görə, sənədləri qaydasına salmaq üçün möhlət istəsələr də, müraciətləri nəzərə alınmayıb.