15 yaşdan kiçik uşaqlara sosial şəbəkələr qadağan edilə bilər

Fransa Milli Assambleyası 15 yaşdan kiçik uşaqların sosial şəbəkələrdən istifadəsini qadağan edən qanun layihəsini dəstəkləyib.

Bu barədə "Reuters" məlumat yayıb.

Məlumata görə, səsvermə zamanı 116 deputat təşəbbüsün lehinə, 23 deputat isə əleyhinə səs verib. Qanun layihəsi cəmiyyətdə onlayn təqib (kiberzorakılıq) və yeniyetmələrin psixi sağlamlığı ilə bağlı risklərin artması fonunda hazırlanıb.

Sənəd yalnız sosial şəbəkələrdə qeydiyyatı deyil, həmçinin digər platformalara inteqrasiya edilmiş “sosial funksiyalardan” istifadənin də qadağan edilməsini nəzərdə tutur.

Qanun layihəsi növbəti mərhələdə Senatın müzakirəsinə təqdim ediləcək, bundan sonra yekun təsdiq üçün yenidən aşağı palataya qaytarılacaq.

Xatırladaq ki, daha əvvəl Böyük Britaniya hökuməti uşaqların internetdə qorunması ilə bağlı yeni tədbirlərin müzakirəsinə başlayıb. Bu çərçivədə müəyyən yaşdan aşağı şəxslər üçün sosial şəbəkələrdən istifadənin məhdudlaşdırılması da gündəmdədir və London bu məsələdə Avstraliyada qəbul edilmiş son qanunvericilik nümunəsini əsas götürür.