Hökumətə etimadsızlıq haqqında qətnamə 8-ci dəfə rədd edildi

Fransa Milli Assambleyasının deputatları Baş nazir Sebastyan Lekornunun rəhbərlik etdiyi hökumətə etimadsızlıq haqqında qətnaməni 8-ci dəfə rədd ediblər.

Bu qətnamə Lekornunun 12 oktyabr 2025-ci ildə qurulan ikinci hökumətinin işə başlamasından bəri səkkizinci və son bir həftədə dördüncü qətnamə layihəsidir. Bunu parlamentin saytında yayımlanan iclasın səsvermə nəticələri sübut edir.

"Zəruri sayda səs toplanmadı, qətnamə qəbul edilmədi", – deyə palatanın spikeri Yael Bron-Pive bildirib.

Qətnaməni 267 deputat dəstəkləyib. Onun qəbul olunması üçün 577 səsdən ən azı 289-u lazım idi. Qətnamə solçu "İtaətsiz Fransa" Partiyası tərəfindən təqdim olunub. Səbəb isə Lekornunun dövlət büdcəsi haqqında qanunun üçüncü və son hissəsini parlamentdə səsvermə olmadan, konstitusiyanın 49-cu maddəsinin 3-cü bəndinə əsasən hökumətin məsuliyyəti ilə qəbul etməsi olub.

Partiyanın parlament fraksiyasının lideri Matilda Pano bildirib ki, qətnamə, ilk növbədə, fransızları misilsiz dərəcədə sərt büdcə qanunundan xilas etmək üçün təqdim olunub. 2026-cı il üçün hökumətin büdcə qanunu müdafiə sahəsi istisna olmaqla, bütün sahələrdə xərclərin azaldılmasını nəzərdə tutur. Müdafiə sahəsində isə əksinə, 6,7 milyard avro həcmində əlavə xərclərin artırılması planlaşdırılır.