3-cü dünya müharibəsi yaxınlaşır | NATO ölkələri savaşa qoşuldu?

ABŞ Prezidenti Co Baydenin Ukraynanın Rusiya ərazisinə uzaqmənzilli raketlərdən istifadə etməklə zərbə endirməsinə icazə verməsi dünya ölkələri tərəfindən birmənalı qarşılanmayıb.

Ukrayna Prezidenti Volodimir Zelenski bildirib: “Ukraynanın gücləndirilməsi planı tərəfdaşlarıma təqdim etdiyim qələbə planıdır. Əsas məqamlardan biri də ordumuzun Rusiya dərinliklərinə zərbəsidir. Bu gün bir çox media orqanı deyir ki, dərinliklərə zərbə endirmək üçün icazə almışıq. Amma zərbələr sözlə alınmır. Belə şeylər açıqlanmır. Raketlər özləri hər şeyi açıqlayacaq”.

Rusiya Xarici İşlər Nazirliyindən isə məsələ ilə bağlı qeyd edilib ki, Ukraynanın Rusiya ərazisinə yüksək dəqiqlikli Qərb silahları ilə zərbələr endirməsi Putin tərəfindən bildirildiyi kimi, NATO ölkələrinin müharibədə birbaşa iştirak etməsi anlamına gələcək, Rusiya da buna adekvat reaksiya verəcək.

Trampın oğlu Donald Tramp Jr. da məlum məsələyə münasibət bildirib. Qeyd edib ki, hərbi-sənaye kompleksi dünyanı Üçüncü Dünya müharibəsinə sürükləməyə çalışır.

Rusiya Federasiya Şurasının Beynəlxalq Əlaqələr Komitəsi sədrinin birinci müavini Vladimir Cabarov isə açıqlamasında deyib ki, ABŞ-nin Rusiyanın dərinliklərinə raket zərbələri endirmək üçün icazə verməsi Üçüncü Dünya müharibəsinin başlamasına səbəb olan misli görünməmiş addımdır. Lakin Rusiyanın cavabı dərhal olacaq:

“Bu, Üçüncü Dünya müharibəsinin başlanması istiqamətində çox böyük addımdır və amerikalılar bunu iki aydan sonra heç nəyə cavabdeh olmayacaq, gedən qocanın əli ilə edəcəklər”.

Polşanın Baş naziri Donald Tusk da məsələyə biganə qalmayıb. O qeyd edib ki, növbəti həftələr təkcə müharibənin özü üçün deyil, həm də gələcəyimiz üçün həlledici olacaq.