500 ildən sonra baş tutan tarixi hadisə barədə diqqətçəkən şərh

“Erməni apostol kilsəsinə qarşı rəngli inqilab edilir”.

Bunu erməni politoloq Stepan Danielyan deyib.

Ekspert oktyabrın 23-də Böyük Britaniya monarxının Vatikana misli görünməmiş səfər etdiyini və burada liturgiyada iştirak etdiyini qeyd edib:

“Katolik və anqlikan kilsələrinin rəhbərlərinin birgə duası köhnə münaqişənin aradan qaldırılmasını simvollaşdırır. III Çarlz son 500 ildə XIV Leo ilə birlikdə Sikstin kapellasında dua edən ilk Britaniya monarxı olub. 1534-cü ildən ‒ VIII Henrix özünü anqlikan kilsəsinin başçısı elan edəndən və Roma ilə əlaqələrini kəsdikdən sonra belə bir şey baş verməmişdi. Bu, iki kilsənin ‒ katolik və anqlikanın yaxınlaşmasını simvolizə edən görünməmiş bir səfərdir. Bu, siyasi aktdır”.

S.Danielyanın sözlərinə görə, bu kimə qarşı dostluq edəcəkləri sualını yaradır:

“Kommunizm və liberalizmin süqutundan sonra dinlər, dini təlimlər və kilsələrin rolu artdı. İndiki geosiyasi qarşıdurma sivilizasiyalar arasındadır, bu baxımdan pravoslav kilsəsi və İslam dünyası, ilk növbədə şiələr qarşı tərəfdədir.

Əvvəllər inqilablar geosiyasi məsələlərin həlli üçün dövlətlərə nəzarəti ələ keçirmək üçün istifadə olunurdusa, indi kilsələr hücuma məruz qalır. Ukraynada pravoslav kilsəsi ilə bağlı ilk həyəcan təbili çalınıb. Növbə erməni apostol kilsəsinindir. Onun başına gələn eyni texnologiyalarla eyni rəngli inqilabdır. “Katolikosu rədd et” şüarı kilsəyə nəzarəti ələ keçirmək və onu kənar idarəçilərə vermək cəhdidir”.

Politoloq əlavə edib ki, Ermənistan Baş naziri Nikol Paşinyan Vatikana səfəri zamanı kilsəyə qarşı təqiblərə görə töhmət almayıb:

“Əksinə, səfərdən sonra hücumlar daha da şiddətlənib”.