ABŞ-dən Qəzzada baş verənlərə reaksiya

“Oktyabrın 7-də İsrailə hücumda iştirak edən silahlıların sayı 1000 nəfərə yaxın idi”.

Bunu ABŞ-nin dövlət katibi Entoni Blinken “ABC” telekanalına müsahibəsində deyib.

“Qəzza ətrafında döyüşlər davam edir. Ölkənin qalan hissəsində vəziyyət daha sakitdir. Amma döyüşlər həqiqətən də şiddətlidir, 1000-ə yaxın döyüşçü İsrailə basqın edib. Onların əksəriyyəti öldürülüb və ya Qəzzaya qayıdıb, amma dediyim kimi, gərgindir. Döyüşlər davam edir”, – deyə E.Blinken bildirib.

Qeyd edək ki, oktyabrın 7-də səhər saatlarında Qəzza zolağından İsrailə raket hücumları başlayıb və eyni zamanda silahlı qruplar yəhudi dövlətinin ərazisinə daxil olub. İsrail Ordusu müharibə hazırlığı vəziyyəti elan edib və tezliklə cavab olaraq "Dəmir Qılınclar" əməliyyatına başladığını bildirib.

Son məlumatlara görə, həlak olan israillilərin sayı 700-ü ötüb. Bu barədə İsrailin dövlət radiosu məlumat yayıb. Bildirilib ki, daha 2200-dən çox İsrail sakini zərər çəkib.