ABŞ İrandan kömək istədi | Yəmən Ordusu nəyə hazırlaşır?

ABŞ ilə İranın husi hərbi qruplaşmasına qarşı gizli danışıqlar apardığı məlum olub.

Ölkənin “Financial Times” nəşrinin yaydığı məlumata görə, 2024-cü ilin yanvar ayında rəsmi Vaşinqton Omanın vasitəçiliyi ilə İranla gizli danışıqlar aparıb. ABŞ rəsmi Tehranın hərbi qruplaşmaya təzyiq göstərməsini və Qırmızı dənizdəki gəmilərə hücum etməyin dayandırılmasını tələb edib.

Sözügedən müzakirələrdə ABŞ-nin nümayəndə heyətindən Prezident Administrasiyasının Yaxın Şərq üzrə müşaviri Bret Makqurk, İran tərəfini isə xüsusi nümayəndə Abram Peyli və ölkənin xarici işlər nazirinin müavini Əli Baqeri Kani təmsil edib. Prezident Administrasiyası İran yönümlü qruplaşmaların iştirak etdiyi hücumların miqyasını azaltmaq məqsədilə diplomatik yollara əl atıb.

ABŞ-nin İrandan kömək istəməsi fonunda hərbi qruplaşmanın sözçüsü Yəhya Sariye Yəmən Ordusunun geri addım atmaq niyyətinin olmadığını və əməliyyatların daha da gücləndiriləcəyini açıqlayıb:

"Yəmən Ordusunun dəniz qüvvələri Qırmızı dənizdə ABŞ-yə məxsus "Pinocchio" gəmisinə qarşı dəniz raketləri ilə əməliyyat həyata keçirib. Hədəf dəqiqliklə vurulub. Yəmən Silahlı Qüvvələri Fələstin xalqına və Qəzza zolağındakı qardaşlarımıza dəstək və yardım məqsədilə Ramazan ayında hərbi əməliyyatlarının miqyasını daha da artıracaq".

“Ənsar Allah” təşkilatı İsrail ilə HƏMAS hərbi qruplaşmasının oktyabrın 7-də münaqişəyə daxil olduğu andan etibarən Qırmızı dənizdə hücumlar həyata keçirir. Qruplaşma lideri bu hücumların Fələstin xalqına dəstək məqsədi daşıdığını vurğulayıb.