ABŞ okeanlarda Çinin qarşısını almaq istəyir

“1867-ci ildə Alyaskanın alınması ABŞ-də tənqidlərə səbəb olsa da, hazırda Şimali Amerikanın bu hissəsi enerji və müdafiə strategiyasının əsas sütunlarından biridir. Arktikanın müdafiəsini gücləndirmək üçün daha bir imkan yaranıb. ABŞ 15 milyard dollara Rusiyanın şərqindəki Komandor adalarını ala bilər. Sakit okeanda, Berinq dənizinin cənubunda yerləşən bu adalar Çinin Şimal Buzlu okeana daxil olmağa çalışan sualtı qayıqlarına nəzarət etmək üçün strateji əhəmiyyətə malik ərazidir”.

“Breaking Defense”də yayılan yazıda qeyd olunub ki, Komandor adalarının ABŞ-yə satılması həm Moskva, həm də Vaşinqtona faydalı ola bilər. Adalarda 676 nəfər yaşayır. Əhalinin etnik tərkibi rus və aleutlardır. Komandor adaları Çinin də maraq dairəsindədir. ABŞ-nin əsas narahatlığı da elə hazırda İpək Yolu kimi iqtisadi layihələrlə fəal olan Çinin sualtı qayıqlarıdır. Çünki “Tsin” və “Tan” sualtı qayıqları arktik sulardan Nyu-York və Vaşinqtonu vura bilən ballistik raketlərlə təchiz olunub.

Çinin sualtı qayıqları Şimal Buzlu okean vasitəsilə Atlantik okeanına çıxsalar, ABŞ-nin adıçəkilən şəhərləri zərbələr üçün daha əlçatan olur. Raket buraxılışından sonra 15 dəqiqədən az vaxt qaldığı üçün ABŞ-nin hava hücumundan müdafiə sistemləri Çinin zərbələrini dəf etməkdə çətinlik çəkə bilər.

Bütün bu ehtimalların reallığa çevrilməməsi üçün Komandor adaları ABŞ-yə hava və su kimi lazımdır. Ağ Ev Komandor və Aleut adlarını su qalxanına çevirmək niyyətindədir. Həm də ABŞ-nin 15 milyard dollar təklifi BMT-nin dəniz haqları ilə bağlı konvensiyasına zidd deyil. Təklifin rəsmiləşdirilməsi Ağ Ev, razılaşdırılması isə Kremldən asılıdır.