ABŞ və İsrailin İranın nüvə obyektlərinə hücumu nə ilə nəticələnə bilər? | İran XİN-dən açıqlama

“ABŞ və İsrail dəli olmalıdır ki, İranın nüvə obyektlərinə hücum etsin. Bu, böyük bir fəlakətə yol aça bilər”.

Bunu İranın xarici işlər naziri Abbas Ərağçi “Sky News“a müsahibəsində bildirib.

Nazir ABŞ və İsrailin İranın nüvə obyektlərinə hücum ehtimalını belə şərh edib:

“Biz açıq şəkildə bildirdik ki, nüvə obyektlərimizə edilən istənilən hücum dərhal və qətiyyətli cavabla üzləşəcək. Amma mən onların belə bir dəlilik edəcəklərini düşünmürəm. Bu həqiqətən də dəlilik olar. Bu, bütün bölgəni çox pis bir fəlakətə sürükləyəcək”.

ABŞ ilə yeni danışıqların mümkünlüyünə toxunan Abbas Ərağçi qeyd edib ki, İran Donald Trampın təkliflərini dinləməyə hazır olsa da, yeni danışıqlara başlamaq üçün şərtlər ötən illərlə nisbətdə yüngülləşdirilməlidir.

A.Ərağçi D.Trampın fələstinlilərin Qəzzadan təxliyəsi ilə bağlı açıqlamalarına da münasibət bildirib:

“Mənim təklifim fələstinlilərin yerinə israillilərin deportasiya edilməsi və onları Qrenlandiyaya göndərərək bir daşla iki quş vurmaqdır”, – deyə İranın xarici işlər naziri qeyd edib.

A.Ərağçi HƏMAS və “Hizbullah”ın son vəziyyətindən də danışıb. Nazir qruplaşmaların zəiflədiyini etiraf edib.