“Ağ Ev İsrailin hücumlarına “yaşıl işıq” yandırdı” | Qərbin əsas məqsədi...

“Düşmənin danışıqlar çağırışı səmimi deyil və 12 günlük savaş göstərdi ki, iranlılar təzyiqlərə boyun əymirlər”.

“Mehr News”un məlumatına görə, bu sözləri İranın Ali Milli Təhükəsizlik Şurasının katibi Əli Laricani islam respublikasının ali rəhbəri Seyid Əli Xameneinin rəsmi saytına müsahibəsində deyib.

Müsahibəsində Laricani bildirib ki, ali rəhbər ona heç vaxt diplomatiyadan imtina etməməyi məsləhət görüb. Amma düşmən diplomatiyanı şou göstərmək üçün səhnəyə çevirmək istəyirsə, heç nəyə nail olmayacaq.

Laricani Omanın vasitəçiliyi ilə ABŞ ilə nüvə danışıqlarından bəhs edərkən bildirib ki, Ağ Ev İsrailin hücumlarına yaşıl işıq yandırdı, halbuki dialoqun 6-cı raundu gözlənilirdi.

“Qərbin diplomatiya çağırışları bəraət xarakterlidir, əslində isə onlar öz məqsədlərinə çatmaq istəyirlər. İran bütün ssenarilərə hazır olmalıdır. Əgər siz müharibə istəyirsinizsə, gedin və işinizi görün. Amma istədiyiniz vaxt danışıqlar üçün gələ bilərsiniz. Sadəcə bilməlisiniz ki, iranlıları müharibə yolu tabe edə bilməyəcəksiniz. Danışıqların şərtlərindən biri də bunu dərk etməyinizdir”, – deyə İranın Ali Milli Təhükəsizlik Şurasının katibi Əli Laricani fikrini tamamlayıb.