Ağ Ev liderlərin danışıqlarının detallarını açıqlayıb - Baku TV

ABŞ administrasiyası bildirir ki, ABŞ və Çin Şimali Koreyanın nüvəsizləşdirilməsi və Hörmüz boğazında hərəkətin sərbəstliyi kimi məsələlərdə ortaq anlayışa malikdirlər.

Bu barədə Ağ Evin internet saytında yerləşdirilən bəyanatda qeyd olunub.

"ABŞ lideri Donald Tramp və çinli həmkarı Si Cinpin Şimali Koreyanın nüvəsizləşdirilməsi ilə bağlı ortaq məqsədlərini bir daha təsdiqləyiblər", – deyə bəyanatda bildirilir.

Bundan əlavə, bəyanatda ABŞ və Çin liderlərinin İranın nüvə silahına sahib olmaması barədə razılığa gəldikləri, Hörmüz boğazının açılmasına çağırdıqları və heç bir ölkənin və ya təşkilatın oradan keçid üçün rüsum almasına icazə verilməməsi barədə razılığa gəldikləri bildirilir.

Qeyd edək ki, Donald Tramp mayın 13-də Çinə rəsmi səfərə gedib. Bu, ABŞ liderinin son 9 ildə Çinə ilk səfəri hesab olunur. Trampı səfərdə ölkənin iri biznes dairələrinin nümayəndələri də müşayiət edib.

Məlumata görə, tərəflər kənd təsərrüfatı məhsullarının idxalı, texnologiya, investisiya və regional təhlükəsizlik məsələlərini müzakirə ediblər.