Almaniya liderindən Vaşinqtona mesaj

 “Mən ABŞ-nin bəzi məsələlərlə bağlı mövqeyini anlamıram. Vaşinqtonun Avropadakı demokratiyanı xilas etməsi üçün səbəb görmürəm”.

Bu sözləri Almaniyanın Kansleri Fridrix Merts deyib.

“Zənnimcə, buna ehtiyac olsaydı, biz özümüz buna nail olardıq. Ən vacib sual bu əməkdaşlığın bizim təhlükəsizliyimiz üçün nə verməsidir. Mən Avropada, o cümlədən də Almaniyanın özündə təhlükəsizliyə gələndə ABŞ-dən daha müstəqil olmalı olduğumuzu düşünürəm. Bu, artıq rəsmi olaraq Vaşinqtonun strategiyasına çevrilib.

Sözsüz ki, ABŞ birinci olaraq özünü düşünür. Bir məqam var ki, amerikalılarla görüşəndə onlara “Amerika sizin üçün birinci ola bilər. Amma sizin dünyada tərəfdaşlara da ehtiyacınız var. Bu tərəfdaşlardan biri də Avropa ola bilər. Əgər Avropa ilə yola gedə bilmirsinizsə, heç olmasa, Almaniyanı özünüzə tərəfdaş edin” deyirəm”, – o əlavə edib.

Qeyd edək ki, dekabrın 8-də Ukrayna Prezidenti Volodimir Zelenski, Almaniyanın Kansleri Fridrix Merts, Fransa Prezidenti Emmanuel Makron Londonda görüşüblər. Onlar Böyük Britaniyanın Baş naziri Kir Starmerlə Ukraynanın aqibətini müzakirə ediblər.