Antonio Quterreşdən Krım və Donbasla bağlı diqqətçəkən açıqlama

BMT-nin baş katibi Antonio Quterreş Rusiyanın Krım və Donbası işğalını millətlərin öz müqəddəratını təyin etmə hüququna istinad edərək haqlı çıxarmaq cəhdlərini rədd edib.

Rusiyalı jurnalist Quterreşdən BMT-nin Krım və Donbası millətlərin öz müqəddəratını təyin etmə prinsipinin tətbiq olunmalı olduğu məsələ kimi nəzərdən keçirə bilib-bilməcəyini soruşub.

Onun cavabı belə olub: "İki vacib prinsip var. Birincisi, dövlətlərin ərazi bütövlüyü. Digəri isə xalqların öz müqəddəratını təyin etməsidir".

O, BMT-nin Hüquqi İşlər İdarəsinin rəyinə istinad edərək, əlavə edib ki, xalqların öz müqəddəratını təyin etməsi yalnız bir sıra zəruri şərtlər yerinə yetirildikdə mümkündür:

"Biz öz müqəddəratını təyin etmə prinsipinin Krım və Donbasa tətbiq edilə bilməyəcəyi qənaətinə gəldik və buna görə də bu vəziyyətdə Ukraynanın ərazi bütövlüyü prinsipi üstünlük təşkil edir".