Apreldə insanlar üzərində bu sınaqlara başlanılacaq

Tokio Universitetinin Qabaqcıl Elm və Texnoloji Tədqiqat Mərkəzinin mütəxəssisləri Nipah virusuna qarşı effektiv olacağı gözlənilən peyvənd hazırlayıblar.

Məlumata görə, insanlar üzərində sınaqların birinci mərhələsi aprel ayında başlayacaq.

Bildirilib ki, peyvənd qızılca virusu əsasında yaradılıb. O, insan orqanizminə daxil edildikdə Nipah virusunun zülallarına bənzər zülalların istehsalına kömək etməlidir ki, bu da immunitet sistemini gücləndirəcək və yoluxma zamanı infeksiyanın inkişafından qoruya biləcək. 

Alimlər artıq peyvəndin effektivliyini və təhlükəsizliyini hamsterlər və digər heyvanlar üzərində aparılan sınaqlar zamanı təsdiqləyiblər.

İnsanlar üzərində sınaqların ilk mərhələsi aprel ayında Belçikada başlayacaq. Uğurlu olacağı təqdirdə, böyüklər və uşaqlar arasında təhlükəsizlik və effektivliyin yoxlanılacağı növbəti mərhələlər 2027-ci ilin ikinci yarısında Banqladeşdə aparılacaq.