Aprelin 22-də Pakistan tərəfləri uzlaşdıra biləcək?

ABŞ-nin vitse-prezidenti Cey Di Vens İranla danışıqların növbəti raundunda iştirak etmək üçün aprelin 22-də İslamabada yola düşəcək.

Bu barədə "Al-Jazeera" telekanalı mənbələrə istinadən məlumat yayıb.

Onun aprelin 21-də Pakistan vaxtı ilə axşam saatlarında Vaşinqtondan yola düşməsi və aprelin 22-si səhər və ya günün birinci yarısında Pakistanın paytaxtına çatması gözlənilir.

Vens İranla danışıqların ikinci raundunda ABŞ nümayəndə heyətinə rəhbərlik edəcək, danışıqlar ilkin olaraq aprelin 22-nə planlaşdırılıb.

Trampın nümayəndələri Stiv Uitkoff və Cared Kuşnerin də İslamabada yollanacağı gözlənilir. ABŞ-nin bir neçə hərbi təyyarəsi gözlənilən danışıqlar ərəfəsində artıq Pakistana eniş edib.

Telekanalın məlumatına görə, İran nümayəndə heyətinin gəlib-gəlməyəcəyi hələlik dəqiq məlum deyil.

İran parlamentinin sədri və danışıqlar qrupunun rəhbəri Məhəmməd Bağır Qalibaf aprelin 21-də Tehranın təhdid pərdəsi altında danışıqları qəbul etməyəcəyini bəyan edib ki, bu da ikinci raundun keçirilməsi ehtimalını şübhə altına alır.

Xatırladaq ki, xarici medianın məlumatına görə, İran ABŞ ilə İslamabadda danışıqların yeni raundunun keçirilməsinə razılıq verib. İranın ali lideri Müctəba Xameneinin ölkənin nümayəndə heyətinin ABŞ ilə Pakistanın paytaxtı İslamabadda danışıqlarda iştirakına yaşıl işıq yandırdığı bildirilir.