Bayden Stoltenberqin gördüyü işlərdən danışdı | Sizin sayənizdə...

ABŞ-nin paytaxtı Vaşinqtonda NATO sammiti işinə başlayıb.

“Ukrayna və trans-Atlantik təhlükəsizlik” mövzusunda keçirilən tədbir həm də Alyansın 75 illiyinə həsr olunub.

Görüşdə bir sıra məqamlar diqqət çəkib. Onlardan biri də NATO-nun sabiq baş katibi Yens Stoltenberqin Ağ Evin rəhbəri Cozef Bayden tərəfindən xüsusi medalla təltif olunması olub.

ABŞ Prezidenti Cozef Bayden Alyansda əldə edilən irəliləyişin baş katib Y.Stoltenberqin sayəsində olduğunu bildirib.

“O, dürüst və intellektual gücə malik, sakit xasiyyətli, böhran anı gələndə siyasi arenada liderlərlə işləməyi bacaran bir diplomatdır. O, hər zaman bizim irəliləməyimizi təmin etmək üçün həll yolu tapır. Bu gün NATO siz vəzifəyə gəlməmişdən əvvəlki vaxtla müqayisədə daha güclü, özünəinamlı və enerjilidir. Avropada və ya Şimali Amerikada və demək olar ki, bütün dünyada bir milyard insan sizin təhlükəsizlik, yeni imkanlar və azadlıq kimi məsələlərdə illərlə çəkən əməyinizin bəhrəsini görəcək. Elə bu səbəbdən də mən sizi ABŞ-nin təqdim edə biləcəyi ən ali ictimai mükafat sayılan “Prezident Azadlıq Medalı” ilə təltif etməkdən məmnuniyyət duyuram”, – o qeyd edib.