Bayden yenə hərəkətləri ilə gündəmə düşdü | Səhv, yoxsa etiraf?
ABŞ Prezidenti Cozef Bayden yenə öz hərəkətləri ilə gündəmə gəlməyi bacarıb.
Bu dəfə ölkə başçısı fevralın 12-də Ağ Evdə keçirilən mətbuat konfransı zamanı İordaniya Kralı 2-ci Abdullahın çıxışı fonunda arxada dayanmaq üçün yer tapa bilməyib.
Görüntülərdə əks olunduğu kimi, C.Bayden çıxışından sonra kürsünü kral üçün tərk edir. İordaniya rəsmisinin çıxışı zamanı ABŞ liderinin təlaş içində ətrafda fırlanması isə onun əqli vəziyyətinin yaxşı olmaması barədə insanlarda şübhə doğurub.
Məlumat üçün bildirək ki, fevralın 9-da sabiq ölkə başçıları Barak Obama və Donald Trampın həkimi olan Roni Cekson Cozef Baydenin əqli vəziyyətinin yerində olmadığını və fəaliyyətini davam etdirməsi üçün xüsusi testlərdən keçməli olduğunu bildirib.
Bundan əlavə, ölkə başçısı çıxışı zamanı daha bir səhvə yol verib. Belə ki, o, Fələstinin Rəfah şəhərində İsrail Ordusu tərəfindən həyata keçirilən hərbi əməliyyatlara “bizim Rəfahda keçirdiyimiz əməliyyatlar” şəklində müraciət edib.
Qeyd edək ki, yerli KİV-də yayılan iddialara görə, İsrailin Rəfahda keçirdiyi və azı 100 nəfərin ölümü ilə nəticələnən əməliyyatda ABŞ-nin də əli var. Hətta iddialara görə, sözügedən hücumlara birbaşa Prezident C.Bayden özü icazə verib. Ölkə başçısının son çıxışı zamanı “bizim Rəfahdakı əməliyyatımız” deməsi də bu iddianın doğruluğu barədə insanlarda şübhə yaradıb.