“Bir qarış torpağımız da...” | Ukraynanın yeganə razı olduğu məsələ nədir?

Rusiya və Ukrayna arasında sutka ərzində 247 döyüş qeydə alınıb.

Hərbi toqquşmaların çoxu Pokrovsk istiqamətində baş verib. Rusiyanın Pokrovska 59 hücumunun qarşısı alınıb.

Ukrayna Silahlı Qüvvələrinin Baş Qərargahından verilən məlumata görə, Liman və Konstantinovka isə 60 hücuma məruz qalıb.

Döyüşlərdə Rusiya Ordusunun 1100 hərbçisi məhv edilib, 7 tank sıradan çıxarılıb. Rusiya Müdafiə Nazirliyinin məlumatına görə, gecə ərzində Ukrayna Ordusunun 136 pilotsuz uçuş aparatı zərərsizləşdirilib.

“Ukrayna sülhə görə öz ərazilərindən imtina etməyəcək”.

Bunu isə Ukrayna Prezident ofisinin rəhbəri Andrey Yermak “The Atlantic”in jurnalisti Saymon Şusterə müsahibəsində deyib.

O bildirib ki, Volodimir Zelenski prezident olduğu müddətdə Ukraynanın bir qarış torpağı da Rusiyaya verilməyəcək.

“Bunu konstitusiya da qadağan edir. Yəni heç kim belə sənədə qol çəkə bilməz. Bunu edən insanlar qanun və xalqa qarşı çıxmış olarlar”, – deyə Yermak əlavə edib.

Onun fikrincə, Ukrayna yalnız tərəflərin nəzarətində olan ərazilərin, təmas xəttininin müəyyənləşdirilməsinə razıdır.