Biz onlara bənzəmirik | Netanyahu alman nazirə sərt cavab verdi

İsrailin Baş naziri Benyamin Netanyahu ilə Almaniyanın xarici işlər naziri Annalena Berbok arasında mübahisə yaranıb.

Qəzza zolağındakı humanitar vəziyyətlə bağlı söhbət zamanı alman nazir İsraili anklavda kəskin aclığa səbəb olması ilə ittiham edib. Bunun ardınca Netanyahu Qəzzadakı vəziyyətin Qərbin düşündüyü qədər də acınacaqlı olmadığını sübut etmək üçün ərazaqla dolu olan mağazaların fotolarını göstərməyə başlayıb.

Almaniyanın xarici işlər naziri isə ona belə cavab verib: “Telefonumda Qəzzadan olan ac uşaqların da şəkilləri var. Sizə onları göstərə bilərəm”.

Məlumata görə, A.Berbok İsrailə anklavda normala dönən həyatın fotolarını yaymağı dayandırmağı tövsiyə edib. Bildirib ki, həmin görüntülər reallığı əks etdirmir.

Bundan hiddətlənən Netanyahu səsini yüksəldib və alman nazirə onların nasistlərə bənzəmədiyini deyib. “Bu reallıqdır. Biz uydurulmuş reallığın saxta şəkillərini yaradan nasistlərə bənzəmirik”, – deyə İsrailin Baş naziri əlavə edib.