“Bu, ABŞ üçün məğlubiyyətdir” | Qalibafdan İsrail və ABŞ-ni cin atına mindirəcək sözlər - Baku TV

“Bu müharibə, sadəcə, hərbi qarşıdurma deyildi. Bu, regionun strateji balansını dəyişdirmək və azad bir xalqa öz iradəsini qəbul etdirmək üçün təşkil olunan bir cəhd idi”.

Bu sözləri İran parlamentinin sədri Məhəmməd Baqir Qalibaf deyib.

O bildirib ki, təcavüzü planlaşdıranlar düşünürdülər ki, hərbi təzyiq, mühasirə, psixoloji əməliyyatlar və terror aktları vasitəsilə İran xalqını geri çəkilməyə məcbur edə və regionun tənliklərini öz istəklərinə uyğun yenidən yaza bilərlər:

“Lakin baş verənlər onların hesablamaları ilə tam ziddiyyət təşkil etdi. İran xalqı göstərdi ki, müstəqil xalqlara öz iradəsini zorla qəbul etdirmək dövrü artıq başa çatıb. Dünya İranın necə müqavimət göstərdiyini və qələbəni necə əldə etdiyini gördü. İtkilərə məruz qalmasına baxmayaraq, İran Birləşmiş Ştatlar və İsraili məğlub etdi. Bu müharibə xalqımıza ağır zərərlər vursa da, bir həqiqəti üzə çıxardı. Ən çətin şəraitdə xalqın müqaviməti və iradəsi təcavüzkarların bütün hesablarını alt-üst edir. Davamlı sülh təmsilçilik, təzyiq və alçaltma nəticəsində yox, güc, izzət və qarşılıqlı hörmət əsasında yaranır”.

Sədr qeyd edib ki, Amerika Birləşmiş Ştatları ilə əldə olunmuş anlaşma memorandumu Vaşinqton üçün məğlubiyyətdir:

“İslamabad anlaşması da təzyiq və məcburiyyətdən yox, İran xalqının müqaviməti və qüdrətinin nəticəsi idi. Bu anlaşma göstərdi ki, dialoq yalnız qarşı tərəf öz iradəsini qədim və mədəni bir xalqa zorla qəbul etdirməkdən əl çəkdikdə və onun hüquqlarını tanıdıqda nəticə verir. Məhz buna görə İslamabad memorandumunu Birləşmiş Ştatların məğlubiyyətinin bəyanatı hesab edirik”.