Bu qərar yeni qarşıdurmanın başlanğıcı ola bilər | Aleksandar Vuçiç - Baku TV

ABŞ Almaniyadakı hərbi kontingentin azaldılması planı çərçivəsində bu ölkədə uzaqmənzilli silahlarla təchiz olunmuş batalyonun yerləşdirilməsi qərarını yenidən nəzərdən keçirəcək.

Bu barədə “Financial Times” Pentaqondakı mənbəyə istinadən məlumat yayıb.

Qeyd olunub ki, qoşunların ixtisarı “Tomahawk” raketləri də daxil olmaqla uzaqmənzilli silahların yerləşdirilməsi planını sual altına alır.

Məsələyə münasibət bildirən Serbiya Prezidenti Aleksandar Vuçiçin sözlərinə görə, ABŞ-nin Almaniyadan hərbi kontingentini çıxarma qərarı Vaşinqtonla Avropa İttifaqı arasında münasibətlərin geri dönüşü olmayan nöqtəyə çatdığını göstərir.

O vurğulayıb ki, bu addım iki əsas Qərb gücü arasında maraqların artıq üst-üstə düşmədiyini nümayiş etdirən ciddi siyasi siqnaldır.

Serbiya lideri əlavə edib ki, bu qərar Almaniya ilə ABŞ arasında qarşıdurmanın başlanğıcı ola bilər və proses sürətlə dərinləşə bilər.

Aleksandar Vuçiç sonda diqqətə çatdırıb ki, Vaşinqtonla yaranan fikir ayrılıqları Serbiyanın iqtisadiyyatı, siyasəti və biznes mühiti üçün də mənfi nəticələr doğura bilər.