Cenevrədəki görüşdə nələr müzakirə olundu?

“Ukrayna, ABŞ və Rusiyanın danışıq qrupları texniki səviyyədə atəşkəsin və ona riayət olunmasının monitorinqinin necə həyata keçiriləcəyini müəyyənləşdiriblər”.

Bu barədə Ukrayna Xarici İşlər Nazirliyi açıqlama yayıb.

Bildirilib ki, danışıqlar mürəkkəb, lakin vacib olub. Qeyd olunub ki, Ukrayna üçün humanitar, ilk növbədə, əsir mübadiləsi pioritet məsələdir.

“İnsanlarımızı qaytarmaq və sülhü yaxınlaşdırmaq üçün hər bir, hətta ən kiçik imkandan istifadə edəcəyik”, – deyə bəyanatda vurğulanıb.

Həmçinin Cenevrədə üçtərəfli danışıqların növbəti raundunun yaxın vaxtlarda baş tutacağı diqqətə çatdırılıb.

Bu arada, Rusiya Prezidentinin köməkçisi Vladimir Medinskinin Cenevrədə Ukrayna tərəfi ilə qapalı görüş keçirdiyi bildirilib. Lakin görüşün təfərrüatları ictimaiyyətə açıqlanmayıb.

Qeyd edək ki, Rusiya, ABŞ və Ukrayna arasında danışıqların yeni mərhələsi 17-18 fevral tarixlərində Cenevrədə baş tutub. Danışıqlarda Rusiya nümayəndə heyətinə Vladimir Medinski rəhbərlik edib. Rusiya nümayəndə heyətinin tərkibinə xarici işlər nazirinin müavini Mixail Qaluzin və Rusiya Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov daxil olub.