Çin Rusiyaya kömək edib? | Vaşinqtondan sensasiyalı ittiham

ABŞ-nin BMT-dəki səfiri Doroti Şi Təhlükəsizlik Şurasının iclasında bildirib ki, Ağ Ev rəhbəri Donald Tramp Rusiyaya 50 gün ərzində Ukraynada sülh sazişi bağlamaq üçün ultimatum verib.

Onun sözlərinə görə, əgər Kreml bu müddət ərzində hücumları dayandırmağa razılaşmasa, Birləşmiş Ştatlar əlavə tədbirlər görməyə hazırdır.

Doroti Şi vurğulayıb ki, artıq 100 gündən çoxdur BMT Təhlükəsizlik Şurası Ukraynadakı müharibənin dərhal dayandırılması və davamlı sülhün təmin olunması ilə bağlı qətnamə qəbul edib. Lakin sülh üçün tələb olunan hərəkətlərə uyğun irəliləyiş müşahidə olunmur:

“Rusiya hələ də dinc ukraynalı vətəndaşları qətlə yetirir. Pilotsuz uçuş aparatları və raketlərlə məktəbləri, uşaq meydançalarını, çoxmənzilli binaları, qocalar evlərini vurur. Rusiya minlərlə Şimali Koreya əsgərini cəbhə xəttinə yerləşdirib və on minlərlə rus əsgərini döyüş meydanlarına göndərir”.

Doroti Şi Çinin Rusiya Federasiyasına hələ də ikili təyinatlı məhsullar göndərməsinə də diqqət çəkib. O, Pekini Rusiyaya kömək etməkdə ittiham edib.

Çin isə bu ittihamları rədd edib.

“Biz ABŞ-ni Ukrayna məsələsində günahı başqasına yükləməyi və ya qarşıdurma yaratmağı dayandırmağa çağırırıq. Bunun əvəzinə Vaşinqton atəşkəs və sülh danışıqlarının asanlaşdırılmasında daha konstruktiv rol oynaya bilər”, − Çinin BMT-dəki səfiri Qenq Şuanq deyib.

O bildirib ki, Pekin münaqişənin tərəfi deyil və heç vaxt heç bir tərəfə öldürücü silahlar təqdim etməyib.