Daxili narahatlığı aradan qaldırmanın yolları

Yaz fəslinin gəlişi ilə bir çox insan daxili narahatlığın artdığını və təşviş pozuntularının tez-tez təkrarlandığını müşahidə edir.

Rusiyalı psixiatr Sergey Litkov bu vəziyyətin həm psixoloji, həm də fizioloji səbəblərdən qaynaqlandığını bildirib.

Psixiatr qeyd edir ki, yaz aylarında orqanizmdə ciddi bioloji dəyişikliklər baş verir. Belə ki, günün işıqlı vaxtı uzanır, neyrotransmitterlərin və hormonların ifrazı dəyişir. Bu proses insanın əhvali-ruhiyyəsinə, yuxu rejiminə və sinir sisteminə birbaşa təsir göstərir. Nəticədə hətta psixoloji cəhətdən dayanıqlı şəxslər belə daxili gərginlik və təşviş hiss edə bilərlər.

Qış mövsümündən sonra həyat tempinin qəfil sürətlənməsi təşviş hissini gücləndirən əsas amillərdən biridir. Sosial münasibətlərin və iş yükünün artdığı bir dövrdə sinir sistemi yeni ritmə adaptasiya olmaqda çətinlik çəkir.

Bununla yanaşı, yazla bağlı yüksək gözləntilər də əlavə stres mənbəyidir. İnsanlar özlərini cəmiyyətin gözlədiyi kimi enerjili və şən hiss etməyəndə daxili sıxıntı və təşviş hücumu ehtimalı yüksəlir.

Litkovun sözlərinə görə, təşviş pozuntusu yalnız emosiyalarla məhdudlaşmır, həm də konkret fiziki əlamətlərlə özünü büruzə verir. Nəfəs almaqda çətinlik, ürək döyüntüsünün tezləşməsi, başgicəllənmə və qəfil ölüm qorxusu kimi hisslər yaranır.

Mütəxəssis xəbərdarlıq edirlər ki, spirtli içkilər təşviş problemini aradan qaldırmır, əksinə, onu qısa müddətə maskalayaraq sonradan vəziyyəti daha da kəskinləşdirir.

Xroniki yorğunluq və yuxusuzluq da bu halları artıran amillər sırasındadır. Psixiatr təsadüfi narahatlıq halları ilə xroniki pozğunluqları fərqləndirməyin vacibliyini vurğulayır. Əgər təşviş hücumları mütəmadi xarakter alırsa və normal həyat tərzinə mane olursa, mütləq tibbi yardıma müraciət edilməlidir.

Qoruyucu tədbir kimi yaz mövsümündə fiziki aktivliyə, emosional balansa və yuxu qaydalarına ciddi riayət etmək məsləhət görülür.

"Sinir sisteminin yeniliklərə öyrəşməsi üçün zamana ehtiyacı var. Rejim stabil olduqda, bu keçid mərhələsi xeyli asanlaşır", – deyə Litkov fikrini tamamlayıb.