Dəməşqin nəzarəti müxalifətin əlinə keçdi | Suriyada son vəziyyət

Suriya Prezidenti Bəşər Əsəd Dəməşqdə deyil.

Bu barədə CNN məlumat yayıb.

Qeyd olunub ki, dövlət başçısı şəhərdə ola biləcəyi yerlərin heç birində yoxdur.

“Bundan başqa, adətən Bəşər Əsədi qoruyan və səfərləri zamanı onu müşayiət edən mühafizəçilər də yoxdur. Bu səbəbdən B.Əsədin qaça biləcəyi ilə bağlı fərziyyələr ortaya çıxmağa başlayıb. Müxalif qüvvələr B.Əsədin harada olması barədə etibarlı məlumatlara malik deyillər və onu tapmaq üçün cəhdlərini davam etdirirlər”, – deyə məlumatda bildirilir.

Bu arada Suriyanın paytaxtı Dəməşq şəhərində güclü atışma səsləri eşidilir. Atışma səslərinin şəhərin hansı hissəsindən gəldiyi hələlik məlum deyil.

CNN-in bəzi Amerika rəsmilərinə istinadən verdiyi xəbərə görə, Suriya Prezidenti Bəşər Əsəd gələn həftə hakimiyyətini itirə bilər.

Qeyd olunub ki, ABŞ Administrasiyasında belə bir ssenarinin getdikcə daha inandırıcı olması ilə bağlı artan konsensus var. Dəməşq Beynəlxalq Hava Limanı təyyarələrin qəbulunu və göndərilməsini dayandırıb.

Digər məlumatlarda isə bildirilir ki, Suriyada müxalifət tərəfdarları paytaxt Dəməşqi nəzarətə götürüb. Qeyd olunub ki, hökumət qüvvələri ölkənin paytaxtından geri çəkilir. Məlumata görə, silahlılar Dəməşqin mərkəzi Əməvi meydanına çatıb və Suriya dövlət televiziyasının qərargahını ələ keçiriblər.