Deyəcək ki, ruslar bizi qovdu | Rusiyalı analitik Paşinyanın ikili oyununu ifşa etdi

“Nikol Paşinyan bizimlə nərd oynayır, əgər doğrudan da, KTMT-də əməkdaşlığın bitdiyini düşünürsə, ərizə yazıb getsin. Onu kim tutub?”.

Bunu rusiyalı analitik Stanislav Tarasov Baş nazir Nikol Paşinyanın Ermənistanın KTMT-dən çıxması ilə bağlı açıqlamasını şərh edərkən deyib.

S.Tarasovun sözlərinə görə, N.Paşinyan Qərbə Rusiya ilə mübarizə apardığını göstərməyə çalışır, amma reallıqda Rusiyanı tərk etmir.

“Qərbə baxıb nəsə almaq çox primitivdir. Bu onun təhsilsiz olmasından xəbər verir”, – deyən analitik vurğulayıb ki, Moskva prosedura uyğun hərəkət edir.

“Əgər işləmək istəmirsənsə, get, amma biz bu qərarı versək, N.Paşinyan deyəcək ki, bizi ruslar qovub. İkinci Qarabağ müharibəsi də ona heç nə öyrətmədi. İndi o, Ermənistanı da itirmək istəyir”, – deyə S.Tarasov qeyd edib.

“Vladimir Putinlə belə danışmaq olmaz. N.Paşinyanın məqsədi Qərbdən ona verilməyən təhlükəsizlik zəmanəti almaqdır. O düşünür ki, Qərb Ermənistana təhlükəsizlik zəmanəti verəcək, amma Qərb bunu etmir”, – deyə S.Tarasov fikrini tamamlayıb.